PONTIFICALIS ROMANI
PARS PRIMA

PONTIFICALE ROMANUM
Clementis VIII. ac Urbani VIII. jussu editum,
postremo a Ss.mo Domino Nostro Benedicto XIV. recognitum et castigatum
Venetiis MDCCXXIII. Apud Hæredes Balleonios
Typ. ac Edit.



DE CONFIRMANDIS

Pontifex, infantes, pueros, vel alios sacri baptismatis unda perfusos, confirmare volens, paratus supra rochetum, vel (si sit Regularis) supra superpelliceum, amictu, stola, pluviali albi coloris, & mitra , accedit ad faldistorium ante medium altaris, aut in alio convenienti loco sibi paratum; & in eo sedens, renibus altari, & facie populo versis, baculum Pastoralem in sinistra tenens, populum coram se stantem admonet, quod nullus alius, nisi solus Episcopus, Confirmationis ordinarius minister est.
Nullus confirmatus debet reconfirmari.
Nullus, qui non sit confirmatus, potest esse in confirmatione patrinus, nec pater, aut mater, maritus, aut uxor.
Nullus excommunicatus, interdictus, vel gravioribus facinoribus alligatus, aut fidei Christianæ rudimentis non edoctus, ingerat se ad percipiendum hoc Sacramentum, vel ad tenendum confirmandum.
Adulti debent prius peccata confiteri, & postea confirmari; vel saltem de mortalibus, si in ea inciderint, conterantur.
Hoc Sacramento contrahitur spiritualis cognatio, impediens matrimonium contrahendum, & dirimens jam contractum; quæ cognatio confirmantem & confirmatum, illiusque patrem & matrem, ac tenentem non egreditur.
Nullus præsentet nisi unum aut duos, non plures, nisi aliter necessitas suadeat, arbitrio Episcopi.
Confirmandi debent esse jejuni. Confirmato debet ligari frons, & sic manere quousque Chrisma desiccetur, vel extergatur. Proinde unusquisque confirmandus portet lineam vittam mundam, cum qua ligetur caput.
Nullus confirmatus discedat, nisi benedictione accepta, quam Pontifex post omnium confirmationem dabit. Infantes per patrinos confirmare volentes teneantur in brachiis dextris. Adulti vero, seu alii majores, ponant pedem suum super pedem dextrum patrini sui. Et ideo, neque masculi feminis patrini, neque feminæ masculis matrinæ esse deberent.
Quibus per ordinem ante Pontificem dispositis, Pontifex sedens lavat manus; deinde deposita mitra surgit, & stans versa facie ad confirmandos, junctis ante pectus manibus, confirmandis genua flectentibus, & manus ante pectus junctas tenentibus, dicit:

Spiritus sanctus superveniat in vos, & virtus Altissimi custodiat vos a peccatis. R. Amen.
Deinde signans se manu dextra a fronte ad pectus signo Crucis, dicit:
V. Adjutorium nostrum in nomine Domini.
R. Qui fecit cælum et terram.
V. Domine exaudi orationem meam.
R. Et clamor meus ad te veniat.
V. Dominus vobiscum.
R. Et cum spiritu tuo.
Tunc extensis versus confirmandos manibus, dicit:
Oremus.
Omnipotens, sempiterne Deus, qui regenerare dignatus es hos famulos tuos ex aqua & Spiritu sancto, quique dedisti eis remissionem omnium peccatorum: emitte in eos septiformem Spiritum tuum sanctum Paraclitum de cælis. R. Amen.
V. Spiritum sapientiæ & intellectus. R. Amen.
V. Spiritum consilii & fortitudinis. R. Amen.
V. Spiritum scientiæ & pietatis. R. Amen.

Adimple eos Spiritu timoris tui, & consigna eos signo Cru + cis Christi, in vitam propitiatus æternam. Per eumdem Dominum nostrum Jesum Christum Filium tuum: Qui tecum vivit & regnat in unitate ejusdem Spiritus sancti Deus, per omnia sæcula sæculorum. R. Amen.

Pontifex sedens super faldistorium prædictum, vel etiam, si multitudo confirmandorum id exigerit, dispositis illis per ordinem super gradus presbyterii, vel alibi, Pontifex stans cum mitra, illos confirmat per ordinem genuflexos; & uno ordine confirmato, illi surgunt, & alii genuflectunt, & confirmantur: & sic usque in finem. Et Pontifex inquirit sigillatim de nomine cujuslibet confirmandi, sibi per patrinum, vel matrinam flexis genibus præsentati, & summitate pollicis dextræ manus Chrismate intincta, dicit:

N., signo te signo Cru + cis: quod dum dicit, producit pollice signum Crucis in frontem illius: deinde prosequitur. Et confirmo te Chrismate salutis: In nomine Pa + tris, & Fi + lii, & Spiritus + sancti. R. Amen.

Deinde leviter eum in maxilla cædit, dicens: Pax tecum.

Omnibus confirmatis, Pontifex tergit cum mica panis, & lavat pollicem, & manus super pelvim. Deinde aqua lotionis cum pane fundatur in piscinam sacrarii. Interim dum lavat manus, cantatur sequens Antiphona, vel legitur a Ministris: quod etiam in similibus servari debet:
Confirma hoc, Deus, quod operatus es in nobis a templo sancto tuo, quod est in Jerusalem. V. Gloria Patri, &c. R. Sicut erat, &c. Deinde repetitur Antiphona Confirma, &c.

Qua repetita, Pontifex deposita mitra, surgit, & stans versus ad altare, junctis ante pectus manibus, dicit:

V. Ostende nobis, Domine, misericordiam tuam.
R. Et salutare tuum da nobis.
V. Domine, exaudi orationem meam.
R. Et clamor meus ad te veniat.
V. Dominus vobiscum.
R. Et cum spiritu tuo.

Deinde junctis adhuc ante pectus manibus, & omnibus confirmatis devote genua flectentibus, dicit:

Oremus.
Deus, qui Apostolis tuis Sanctum dedisti Spiritum, & per eos, eorumque successores, ceteris fidelibus tradendum esse voluisti: respice propitius ad humilitatis nostræ famulatum, & præsta, ut eorum corda, quorum frontes sacro Chrismate delinivimus, & signo Crucis signavimus, idem Spiritus sanctus in eis superveniens, templum gloriæ suæ dignanter inhabitando perficiat: Qui cum Patre, & eodem Spiritu sancto vivis & regnas Deus in sæcula sæculorum. R. Amen.

Deinde dicit:
Ecce sic benedicetur omnis homo, qui timet Dominum.
Et vertens se ad confirmatos, faciens super eos signum Crucis, dicit: Bene + dicat vos Dominus ex Sion, ut videatis bona Jerusalem omnibus diebus vitæ vestræ, & habeatis vitam æternam R. Amen.

Expedita itaque Confirmatione, Pontifex sedens, accepta mitra, patrinis & matrinis annuntiat, quod instruant filios suos bonis moribus, quod fugiant mala, & faciant bona, & doceant eos Credo, & Pater noster, & Ave Maria: quoniam ad hoc sunt obligati.

Hoc Sacramentum postest conferri minus solemniter quocumque die, hora, & loco, ex causa ad arbitrium Episcopi.